फोनवर वाचा नि पुढे ढकला
गहाण टाका आपल्या अकला
मत, विचार झटपट करा
सगळं सोपं-सपाट करा
बाजू तर ठरलेलीच आहे
आता सांगा काय घडलं
मुद्दे, शब्द तयारच होते
पहा त्यांना कसं झोडलं
अतिशहाण्या, दीडशहाण्यांना
बडवून सरळसोट करा
सगळं सोपं-सपाट करा
कामधंदा नंतर बघू
आधी हिशोब चुकते करा
कीड पसरवणाऱ्या ढोंग्यांना
आधी समोर झुकते करा
रोज त्यांच्या नांग्या ठेचणे
हीच आता वहिवाट धरा
सगळं सोपं-सपाट करा
आपल्याकडे सत्य आहे
त्यांना झाला आहे भ्रम
सत्ता त्यांना वापरून घेते
वेडे करती फुकाचे श्रम
आपण मात्र तत्त्वांची
झपाटलेली वाट धरा
सगळं सोपं-सपाट करा
मी म्हणतो तेच प्रश्न
मी सांगतो तीच उत्तरे
त्या लोकांच्या लायकीची मी
वेशीवरती टांगतो लक्तरे
माझ्या उदात्त ध्येयाचा
तुम्ही सुद्धा हात धरा
सगळं सोपं-सपाट करा
सगळं सोपं-सपाट करा
कोणत्याही टिप्पण्‍या नाहीत:
टिप्पणी पोस्ट करा